Hello dost, kya haal hai? Yaha tak aaye to pura padke jaana. Thoda bore ho sakte ho lekin mera aapse promise hai ki aakhir tak padoge to kuch achha sikh ke jaoge.
Dekho, mai aapko kuch aisa bolke aapka time pass nahi karunga jaisa ki sare blogger bolte hai aur fir aap aakhir me irritate hoke chale jate ho jaise ki, kya aap paisa kamana chahte ho ? paisa kamane ka top 10 jabardast tarike aur bhi bahut kuch. Aur last me aapko milta kya hai, wahi ghisi piti si ideas jo ki aapko lagbhag sare blog me mil jayenge alag alag roop me. Jaise ki Blogging se paise kamaye, YouTube se paise kamaye, Aur haa affiliate marketing se (ye to pakka fix hi hota hai sabka) agar ye nahi ho to online paise kamane ka tarika ka blog banane ka maksad hi pura na ho.
Jara sochiye kitna disappointed fill hota hai jab aap ek ummid se aate hai kuch search karke ki kuch naya idea milega online paise kamane ke baare me aur fir aap apna kimti time lagate hai pura blog padne ke liye lekin aapko kya milta hai, wahi ghisi piti si baaten, ideas jo ki aaj se 5-7 saal pehle bhi tha aur aaj bhi wahi hai. Agar mai jhooth bol raha hu to aap mujhe batao ki niche diye gaye ideas ke alawa aapko kuch naya mila hai aaj tak kisi bhi blog me? Agar mila hai to comment karke jaroor batana mai comment box open rakh dunga aapke comment ke liye.
Freelancing
Mobile Apps
YouTube channel
Blogging
Content writing
Social Media influencer
SEO
Web development
Affiliate Marketing
Google Adsense
Share market
Photo Selling
Surveys and Reviews
Video Editing
Sell product online
Online coaching class
E-book selling
Data entry
Voice over artist
Graphic designer
Web designing
T-shirt printing
Rent car
Translator
Captcha filling
Online course selling
Crypto trading (Ye wala thoda naya add hua hai blogger ke list me)
Transcription
Aur haa kutto ko ghumana (Ye wala to hoga hi part time income source wala job ki category me)
Chaliye bahut hua ab asli mudde par aate hai. Paise kaise kamaye? How to earn money? Yehi padne ke liye yaha tak aane ka kast kiye ho na aap? To suniye itna to guarantee deta hu ki in traditional blogger ke bataye huye raaste se to aap bilkul paisa nahi kamayenge. Inko padke aap to paisa nahi kama pate hain lekin itna pakka hai ki ye log lakho karodo me paisa chhap kar la jate hain aapko paisa kamane ke bakwas tarika batake.
Lekin aapka ab ye question hoga ki aap mera blog kyu pade. To suniye, pehli baat to mujhe bhi yaha paise hi kamane hai lekin aapko miss guide karke nahi balki aapko sach batakar na ki aapko ghisi piti tarike baatakar.
To chaliye suru karte hain ki hum aur aap kaise asli me paisa kama sakte hai aaj ki tarikh me.
Pehli baat to aap ye baat note kar le ki aap apna time waste karke faltu ke articles padke kabhi paisa nahi kama sakenge. To sabse pehle aap aaj aur abhi se ye tay kar le ki aaj ke baad kabhi bhi Google me ye search nahi karenge ki “Online paise kaise kamaye” paise kamane ke best tarike ya top 10 to 100 tarike kyuki sirf padke aap kabhi bhi paise nahi kama payenge. Bas thoda bahut jankari mil jayegi ki dunia me kya chal raha hai.
Ye sach hai ki kuch log in ghisi piti tarike se paise kama rahe hai, lekin aap bhi kamayenge iski koi guarantee nahi hai.
Paise kamane ke liye sabse pehle to aapko paise ke baare me nahi sochna hai kyuki jaise hi aap sirf paise ke baare me sochenge aapka focus hat jayega aur aap ek jagah tik nahi payenge. Kyuki aapka mind baar baar change hota rahega aur jab bhi aap kuch naya dekhenge jaha jyada paisa hai aapka man fir change ho jayega, fir aap kahoge wo nahi ab ye karte hai kyuki isme jyada paisa hai. Aur fir is tarah se aap sirf bhatakte hi rah jayenge, kabhi bhi ek chij pe focus nahi kar payenge paise kamana to door ki baat hai.
Niche mai kuch mukhya baaten share kar raha hu jise aapko paise kamane me wakai me madad karegi.
Kyu paise kamane hai is baat ko spasht kare khudse - Aapko pata hai jyadatar log paise kyu nahi kama pate kyuki unko ye spast hi nahi hai ki paise kyu kamane hai. Aap kahenge ki ye to sabko pata hai ki paise kyu chahiye isme sochna kya hai. Hum sabko ek behtarin lifestyle jeene ke liye paise chahiye. Gadi, ghar ityadi kharidne ke liye paise chahiye mahenge shopping karne ke liye paise chahiye. Basically hum paise isliye kamane chahte hai kyuki hume ek luxurious life chahiye.
Bas, isiliye aap paise nahi kama pa rahe hai kyuki aapka paise ko leke soch aur disha hi galat direction me hai. Kyuki ye reason to har kisi ke paas hai fir aapke alag kya hai. Agar luxurious jine ke liye hi paisa chahiye is motivation ko leke insan paisa kama sakta to aap duniya me har koi amir hota, kyuki har koi to yehi socha raha hai paise ke baare me.
Lekin aisa nahi hota kyuki ye koi thos reason nahi hai paisa kamane ke liye, ye to bas ek sapna hai jo har koi dekhta hai.
Ab aapka question hoga ki to kya kare? Kya soche jisse ki paisa kamaya ja sakta hai. To suniye hum paisa isliye nahi kama pate hai kyuki iska hume sach me jaroorat nahi hoti hai, agar sach me jaroorat hoti to aap jaroor paisa kama lete. Aisa mai isliye keh raha hu kyuki aap khud soche aaj tak aapke saath kabhi hua ki aapko koi emergency aayi aur wo emergency abhi tak aapke saath hai? Nhi, aisa ho hi nahi sakta kyuki aisa hota to aap abhi mere blog ko aaram se pad nahi rahe hote. Aap abhi yaha hai isliye kyuki aapke paas koi emergency nahi hai abhi. To iska matlab ye hua ki jab bhi koi emergency ki situations aati hai life me hum kisi na kisi tarike se use suljha hi lete hai. Aus wo sulajh bhi jati hai. Ye anubhaw lagbhag hum sabke life me ek hi saman hota hai. Ki jab bhi koi kaam as a emergency hoti hai hum turant usme serious ho jate hai aur sabkuch bhool kar ek jagah concentrate ho jate hai us emergency ko sort our karne me.
To iska matlab saaf hai ki har wo kaam jo ki aapko wakay me chahiye aap use har haal me pa hi lete hai to fir aap paisa kyu nahi paate hai? Kyuki aapka jo paisa kamane ke liye motivation hai wo bahut hi dheela dhala sa hai, bahut hi mamuli hai, isme koi emergency wali situation nahi hai, isliye aap paisa nahi kama pa rahe hai.
Agar sach me paisa kama hai to apne life me paise ko leke wo emergency type of motivation create kariye. Aaap khudse sawal kare ki kya wakai me mujhe amir banna hai ya main isi me khush hu. Sirf logo ko dekhke, youtube videos dekhke mujhe bhi paise kamane ka man kar raha hai.
Agar aapko sach me paise ki jaroorah hai to mera dawa hai ki aapko kisi bhi motivational speaker ko sunne ki jaroorat nahi hogi, aapka khudka motivation hi kafi hai.
Jitne bhi amir log hai is dunia me aap unka biography padke dekhe, aapko pata chalega ki unke andar paisa kamane ke liye wo emergency wali aag thi tabhi wo itna amir ban paye hai. Agar aapme bhi wo aag hai to aaj aur abhi se aap paise kamane ki disha me apna pehla kadam badha sakte hai.
Apne area ka problem khoje - Ab agar aapka kyu clear hai to ab aapka dusra kaam hai ki aap apne aas paas ke problems ko dekhe use observe kare. Aaap dekhiye ki kya aapke aas paas koi aisi problem hai jisse aap bahut jyada irritate hote hai. Appko aisa feel hota ho ki agar mai hota to ise chutkiyo me solve kar deta. Yaha mai aapko apne aas pass ke problem isliye dekhne ke liye bol raha hu kyuki isse bada motivation aapko kahin bhi mil hi nahi sakta kyuki yaha aap bachpan se rahe hai aapko apne area apne logo ke baare me sabkuch pata hai. Chhote chhote chijo ko observe kare, dekhe ki inme se kya aisa hai jisko mai solve kar sakta hu.
Aap news, ya YouTube video dekhne inspire na ho kyuki jyadatak case me ye problems directly aapke saath jude nahi hote hai aur news ke chakkar me padenge to ghanchakkar ban jayenge kyuki inke liye problems mayne nahi rakhta TRP mayne rakhta hai. Aaj koi badi rape ka ghatna hua aur log pradarshan karne lage to ye ek mahine tak rape ka hi news dikhayenge aur aisa dikhayenge ki har jagah rape hi ho raha hai. Aur fir iske bich me agar Taimur ka birthday aa gaya to sare rape ki ghatnaye achanak se khatam ho jaati hai inke liye, aur fir 10 din tak Taimur ka birthday party hi celebrate karne lag jayenge ye news wale.
Isliye news dekhkar kabhi bhi apne andar motivation lane ki koshish na kare kyuki ye unpar nirbhar karta hai ki wo aapko kya dikhana chahte hai. Aapko real motivation to aapke reality se hi milegi, kahi aur se nahi.
Apne passion ko na chhode - Jab bhi pasion ko follow karne ki baat aati hai to hum kuch gine chune passion ke bare me hi sochne lagte hai jaise ki singing, painting, acting aur hume lagta hai ki ye sare passion to humare andar hai hi nahi to hum kya follow kare. Lekin mai aapko bata du ki passion ka matlab sirf singing, acting aur painting hi nahi hota hai balki kuch aur bhi hota hai.
Passion ka matlab hai ki koi bhi kaam jisko aap bina thake lagatar kar sakte hai bina kisi ke dawaw ke. Matlab aisa kaam jisko ki aap bina paise ke bhi man lagakar kar sakte hai. Ye kaam kuch bhi ho sakta hai jo aap bachpan se lekar aaj tak karte aa rahe hain. Yaha aapko ye bhi bata du ki jaroori nahi ki passion humesha ek saman hi rahe, passion change bhi ho sakta hai. Ho sakta hai kuch chije aapko 10 saal pehle achhi lagti thi lekin ab wo achha nahi lagta. Aur ek baat passion ke baare me aapko galatfemi bhi ho sakta hai. Ho sakta hai ki aapko lagta ho ki ye meri passion hai lekin sirf lagne se nahi hota hai, aapko us kaam me utarna padega aur khudse feel karna padega ki kya wakay me ye mera passion hai ya fir ye mera bhram hai, logo ne uksa diya ki tum bahut achha gate ho aur soch liye sangeet hi mera passion ho aur nikal pade sangitagya banne.
Passion kuch bhi ho sakta hai, ye ho sakta hai ki aapko bachho ko padane me bahut maza aata hai, ho sakta hai aapko bike chalane me bahut aanand aata ho, ya fir sabjiya ugane me. Passion ka koi criteria nahi hota ho ye kuch mamuli sa kaam bhi ho sakta hai jiska logo ki nazar mai koi value nahi hai lekin aagar aapko usme maza aata hai to uska value aap bada sakte hain.
Ek baat yaad rakhen ki koi bhi kaam ho chai banane se lekar jhadu lagane tak aur sangeet se lekar software engineer tak, aisa koi bhi kaam nahi jisme aage tak potencial nahi hai. Bhale hi aaj aapko jhadu lagana chhota kaam lagta ho lekin agar aap sach me safai ke prati jaagrook hain to aap apne is passion ko next lebel tak lekar ja sakte hai. Aapka yehi safai ke prati jagrookta aapko safalta ke uchai tak pahucha sakta hai. Aap karodo logo me safai ke prati jagrookra la sakte hai. Aap apni sanstha khol kar lakhao logo ko apne saath jod sakte hai aur dekh aur dunia ko swachh banane ke liye behtarin kaam kar sakte hain.
Yaha main aapko sirf hint de raha hu ki passion ko follow karne ka matlab kya hai aur aap apne passion ko follow karke bhi kaise aage badh sakte hain. Jaroori nahi ki aap jhadu hi lagaye lekin main aapko yaha ye samjhane ki koshis kar raha hu ki sochte kaise hai. Aur chhoti chhoti se kaam me bhi kitna jyada potential chhupa hota hai agar aap sach me apne passion ke prati serious ho to.
Skill development - Ek to hai ki aap apne passion ko follow kar sakte hai lekin aagar sach me aapko sach me lagta hai ki aapke angar passion jaise kuch nahi hai jaisa ki bahut logo ko lagta hai ki ki use pata hi nahi chal pata hai ki uske andar kon sa passion hai. To fir aap skill development pe kaam kar sakte hain.
Aaj ke samay skill develop karna koi badi baat nahi hai. Aap koi bhi skill aasani se sikh sakte hain. Yaha main kisi application ka reference nahi de raha hu lekin aapko pata hai ki bahut sare online/ofline platforms hai jaha aap kuch thode se paise invest karke ya YouTube pe free me apna manchaha skill develop kar sakte hain.
Agar ek baar aapne sahi se apna skill develop kar liya to fir aapko piche mudkar dekhne ki jaroorat nahi padegi, kyuki tab fir raaste bhi aapke liye khool jayenge. Aapko fir kya karna hai aapko khud raasta dikhne lagega kyuki aapne apna pehla kadam rakh diya hai safalta ki aur.
Pehla kadam - Ye bahut hi jyada important hai, bahut hi jyada kya sabse jyada important hai aapke success ke liye. Kyuki aap kitna bhi soche kitna bhi sapna dekhe, aapka sapna bas sapna hi reh jayega agar aapne pehla kadam nahi rakha. Jo bhi log sochte hai ki use safalta nahi mil rahi hai uska bas ek hi karan hai ki unhone apna pehla kadam nahi rakha. Kyuki safalta ek aisi manjil hai jisme aapko khudse chalkar hi jana padega. Iske liye koi bhi gadi ya ghoda nahi bana hai jisme baithkar aap asani se manjil tak pahuch jayenge.
Isliye aap agar mujhse puche ki kisi bhi vyakti ka safalta ka kya raaj hai to mera answer hoga “Pehla kadam” bas yehi ek jadui sutra hai jisko apnakar aap bade se bade success ka jhanda gaad sakte hai aur bahut sara paisa kama sakte hai.
Bas is article ke madhyam se main aaplogo ko yehi samjhane ka prayash kiya ki aap kitne bhi motivational videos dekh le ya kitna hi sapna saja le lekin safalta to aapko sabhi milegi jab aap khudse motivate honge aur apna motivation ko action me layenge. Nhi to aap har roj motivate hote rahenge aur fir thodi der baad so jayenge aur sote sote kar aap budhe ho jayenge aapko pata bhi nahi chalega.
Phir aapke paas apne pota poti ko kissa sunane ke liye kuch kissa hi nahi hoga jisko sunane me aapko garv mehsoos ho.
Agar aapko mera samjhane ka andaaz achha lage to aap bhi mujhe motivate karne ke liye mujhe comment karke apna ray de taki mujhe bhi prerana mile aur is tara h ke articles likhne me. Kyuki main bhi aap hi ki tarah ek sadharan sa insaan hu jise bhi motivation ki jaroorat padi hai.
Bahut bahut aabhar
Bipin Sen
No comments:
Post a Comment